الثلاثاء، 25 نوفمبر، 2008

ليه...؟؟

ليه دايما لما بنشتاق لحاجه مش بنلاقيها

ليه لما بنبكى مش بنلاقى اللى بيمسح لينا دموعنا

اليه لما بنصرخ اوى اوى مش بنلاقى اللى بيهدينا

بننجرح كل يوم وبنتالم كل يوم ولا حد حاسس

ليه الدنيا الم ليه مبقاش فى امل

ليه دايما مظلومين

ليه دايما مجروحين

ليه قلوبنا مكسورة ودموعنا مهدورة

ليه لما بنحكى بنشكى وبنبكى

راحت فين البسمه وراحت فين الضحكه

وفين ناس زمان وفين دنيا زمان

وفين ايام زمان

اتسرقت مننا ايامنا ولا احنا دارين

وراحت مننا ضحكتنا ولا احنا حاسين

اصل احنا بنحس بالجرح اوى وبيعلم فى قلوبنا اوى

اصل الفرح قليل

بننجرح كل يوم وبنتالم كل يوم

وبنبكى كل يوم

وعن الفرح احنا سالين

وللبسمه احنا مستنين



السبت، 15 نوفمبر، 2008

60...؟؟


بقى عنده ستين سنه بقت عندها ستين سنه
يعنى طلع وطلعت على المعاش
المفروض يسموه سن الخوف
والانطوائيه....
مش عارفه هو صح ولا غلط يطلعوا العاملين فى سن الستين
بس كل اللى بشوفه ان اللى بيطلعوا عل المعاش بيتعبوا اوى بعدها
بيحسوا انهم بقوا مش ليهم لازمه خلاص
وبيقعدوا فى البيت من غير ما يعملوا حاجه
وبيتعصبوا لاتفه الاسباب
وكمان بيفكروا ان اى حد بيتكلم بيتكلم عليهم
ولما فكرت لقيت ان بردة مش ينفع
يستمروا بعد الستين
امكانيتهم على الشغل حتقل
وكمان الشباب كدة حيستنوا عمرهم كله علشان
يشتغلوا
مش عارفه لما يطلعوا على المعاش فى سن الستين صح ولا غلط....؟؟
بس كل اللى انا عارفاه انهم بيتعبوا اوى اوى.....!!!!
اختكم
حزينه اوى

السبت، 8 نوفمبر، 2008

روح...


لما بنكون لوحدنا وبنفتكر ايام زمان
بيجى فى بالنا ناس للاسف مش معانا
فى دنيتنا دلوقتى بنفتكرهم وبنتالم لفراقهم
وبنتمنى انهم يكونوا معانا دلوقتى
بنفتكر ليهم مواقف وبنسمع صوتهم
وبنتخيل ضحكتهم...
كانهم قاعدين معانا دلوقتى
وبتبتسم شفايفنا غصب عنا
وبنعيش معاهم لحظه
بس لحظه....
وفجاه بنصحى على الم الواقع
ان الناس بتوع زمان
مش معانا واننا من غيرهم دلوقتى
ساعتها بنتمنى بس روحهم تطوف
حوالينا علشان نقولهم بجد وحشتونا

الأربعاء، 5 نوفمبر، 2008

مرتاح....؟؟


من الاسئله الصعبه اوى
اللى ممكن نتسالها فى حياتنا
انت مرتاح...؟؟
ولو دورنا على معنى الراحه اللى بجد
حنلاقى نفسنا مش مرتاحين بالمرة
فكرت بينى وبين نفسى قولت ازاى ابقى
مرتاحه _يبقى عندى فلوس كتير_
ابقى بنت رجل اعمال مشهور لقيت اللى عندهم
فلوس كتير مش مرتاحين ورجال الاعمال اصل التعب
امتى لما حد يسالك انت مرتاح ....؟
تقوله اه مرتاح وانت من جواك واثق انك مرتاح.
بس للاسف مش فى حد مرتاح لان لو حد مرتاح
محدش حيسال السؤال دة اصلا...

السبت، 1 نوفمبر، 2008

القاهرة وعمرو...




السلام عليكم اولا
يارب تكونوا كلكم بجد بخير من غير حزن ولا جروح
القاهرة اليوم
او
عمرو اديب
مين فى مصر مش بيتفرج على البرنامج ده...؟
كنت فى الاول بقول ان البرنامج دة احسن برنامج فى الدنيا
وكنت بقول ان عمرو اديب ده مادام بيناقش حاجات مهمه كدة فى البلد
يبقى لازم حد حيتصدرله وحيعمل فيه حاجه وكنت بحب كلامه اوى مع انه
ساعات بيقطع المكالمات وبيستضيف ناس مالهاش لازمه بس كنت بحبه بردة
لحد مالقيت اراء ناس كتير ناس بتحبه اوى... وناس بتحترمه اوى.... وناس بتكرهه اوى
وبقيت مش عارفه مين هو معانا ولا مع الحكومه بس مش عارفه مع ان الاراء اختلفت بس بردة بحب
البرنامج والناس اللى بتقول انها مش بتحبه بردة بتتفرج على البرنامج يعنى بحس ان برنامج غير اى برنامج
واكيد فاهمين قصدى....!!