الأربعاء، 30 أبريل 2008

اوعوا تنسونى


السلام عليكم
انا حغيب عنكم شويه علشان عندى امتحانات ومذاكرة
وكليه وكلام من دة يعنى .. ادعولى ربنا ينجحنى.
اوععوا تنسونى انا حرجعلكم بعد الامتحانات
اختكم
sad

الوقت والجرح....!!!


لم اكن اعلم ان الوقت يؤثر هكذا فى القلوب لم اكن اعلم ان الايام وحدها القادرة على ان تداوى جرح القلوب
اكيد منا مجروحين اكيد منا متالمين بس بردة اكيد احنا عايشين يعنى بيمر علينا الوقت وبتعدى الدقائق
غريبه تلك الحياه فى بدايه الجرح نشعر ان العالم توقف وان الدنيا شلت وان الوجود انتهى عند هذةالنقطه..
ولا حركه بعد هذا الالم ولا طريق بعد هذة الصدمه بس الاغرب من هذا اننا نرجع مرة اخرى
الى حياتنا والى يومنا الطبيعى بمرور الوقت كيف....؟؟
لا اعلم لكنى كل ما اعلمه ان افضل دواء للقلوب اى لجرح القلوب هو الوقت والله طبعا لكننا نزال نتالم لكن حياتنا تستمراوجعنا فى قلوبنا لكن حياتنا تستمر النزيف فى قلوبنا يدوى لكن حياتنا تستمر
الوقت نعم الوقت يحركنا من اللاحركه الى الحركه مرة اخرى ويحول الحياه
لمعادله معقدة من جرح والم ونهايه وبكاء ودموع الى ذكرى تمر بناالى عالم فى غرفه مظلمه يجعلنا نتالم دقيقه ويرجع بنا مرة الى واقعنا لكننا وسط زحام الدنيا ننتظر ما سيحملهلنا القدر ويمحيه عنا الوقت الوقت
.................................................................
...............................................................
.......................فلننتظر الوقت....؟؟

تاج....... عنى انا


السلام عليكم
وصلنى التاج دة من الاستاذ علاء سالم
صاب مدونه علاء سالم
اسمحوا لى ان اجاوب.....
كنت طالب شاطر فى المدرسه؟؟

كنت طالبه متوسطه

ايه كانت احب مادة ليك فى المدرسه والكليه؟

العربى لانى اصلا ادبى وبحب المواد النظرى

اكرة مادة ليك فى المدرسه والكليه؟

الرياضه مش كنت بحبها ومازلت مش بحبها

كنت عايز تطلع ايه وانت صغير؟

كنت عايزة اطلع حاجات كتير دكتورة وصحفيه وممرضه من الاخر...مش كان ليا هدف محدد

اغرب حاجه اتمنيتها هى انى ابقى؟

رسوله او نبيه(بس كنت صغيرة اوى ومش فاهمه)

اسم مدونتك؟

كان عندى واحدة اسمها نيد لوف وبعدين عملت مدونتى دى واسمها حزينه

ولماذا اخترته؟

يعنى علشان اكتر احوالى ببقى كدة

هل فكرت فى اغلاق مدونتك؟ السبب؟

لا مش فكرت فى اغلاقها خالص علشان هنا بعرف اقول اللى فى قلبى من غير خوف(مع انى ساعات ببقى خايفه بردة)

صورتك فى المدونه ترمز لايه؟

بنوته على هيئه ملاك

احلى جمله قيلت فى وصف مدونتك؟

مش فى ولا جمله قيلت فى مدونتى اصلا

التعليقات بالنسبه لك..اهميتها؟

هى حياة وروح بالنسبه للمدونه

ما احلى بوست كتبته ضع اللينك واذكر لماذا؟

انا اصلا مش بكتب لينكات حلوة يعنى مش بعرف احدد اذا كان اللينك حلو ولا لا ولو حسيت ان فى لينك حلو اكيد حكتب اللينك بتاعه هنا

احلى مدونه قرأتها؟

مدونات كتير حلوة قراتها وبالاخص المدونات اللى بتنقد الوضع الحالى فى كل حاجه

حد قل ادبه فى التعليق؟ وعملت ايه؟

لا مش فى حد قل ادبه قبل كدة ربنا مش يجيب زعل

ايه اللى يحصل لايميلك لما تموت؟

حيموت !!

اديت الباسوورد بتاعك قبل كدة لحد؟

لا

اسمك؟

حزينه

الدلع المشهور به وسط اصحابك؟

مش فى حد بيدلعنى

مجال دراستك؟

كليه نظريه بحته

شخصيتك نوعها ايه؟

مش عارفه

مودك ايه؟

مش عارفه هو يعنى ايه مود اصلا

بتعمل ايه فى وقت فراغك؟

على الكمبيوتر او بقرا او بتفرج على التليفزيون او نايمه او بفكر او بعيط

الاكله المفضله؟

صينيه فراخ ببطاطس

السفر بالنسبه لك؟

هروب

اكتر ست حاجات بكرها؟

  • العفاريت
  • الموت
  • الخوف
  • بكاء امى
  • الضلمه
  • انا

اكتر حاجات بحبها؟

  • ماما
  • ذكرى جميله
  • مريم
  • الحنيه
  • الرسول
  • الريحان

الشغل بالنسبه لك؟

اكتفاء ذاتى

الكمبيوتر والنت بالنسبه لك؟

فضفضه وبوح القلب

بجد تمرر التاج لمين؟

صاحبة مدونه جبهه التهييس الشعبيه

شكرا كتير على التاج وياريت اجابتى تبقى عجبتكم

اختكم

sad

الثلاثاء، 29 أبريل 2008

انت شايف ايه...؟


مصر والعراق وفلسطين
ياترا فى امل ولا خلاص نفقد الامل
بالنسبه لمصر فى امل فى حكامها وشعبها..؟
ولا العراق فى امل فيها ترجع تانى من احسن الدول..؟
ولا فلسطين ياترا لسه فى امل ان الخنازير يطلعوا منها ولا
خلاص فقدنا الامل ......؟
انت شايف ايه..... فى امل؟؟؟!!!

الاثنين، 28 أبريل 2008

سؤال....؟؟






بجد سؤال كتير محيرنى
هي ليه سوزان مبارك مش لابسه حجاب....؟؟؟

الأحد، 27 أبريل 2008

تعبت...






ايوة انا انســــــــــــــانه تعــــــــــــــــــــــبت اوى من الدنيا ومن الزمن
تعبت من اللى شفته ومن اللى بشوفه ومن اللى حشوفه
صعبه اوى الدنيا وصعبه اوى الناس
كل حاجه اتغيرت والايام بتمر والعمر بيروح
واحنا لسه زى ما احنا بنتفرج على السباق من بعيد
بنشوف حياتنا قصاد عنينا بتتسرق
وساكتين بنبكى ودموعنا بتحرق فينا وساكتين
ناس غاليه بتروح مننا وناس جاحدة بتتزرع وسطنا
ومش عارفين نعمل ايه فى الدنيا الاسيه اوى
لما بنضحك بنفتكر اننا مجروحين
ولما بنبكى بنسى اننا بنى ادمين وايه العمل..؟؟
ساعدنى يا زمن
ساعدنى يا قدر........؟

مبروك...





مبروك......!!
مبروك لمصر فازت بكاس الامم الافريقيه لسادس مرة
وباين ان مصر مش نافعه الا فى الكورة وبس....
بس بردة مبروك لمصر .... .

روح







السلام عليكم



انا روح جديدة على عالم المدونات



عايزاكم تشاركونى دموعى


وابتسامتى النادرة



واشاركم دموعك

وابتسامتكم الدائمه






اختكم

M