الاثنين، 15 ديسمبر، 2008

بوفر وقت....



السلام عليكم

مش عارفه هو انا اللى كبرت ولا مستوى التعليم فى مصر هو اللى نزل

مش عارفه كنت مروحه فى يوم قابلت واحدة جارتنا فى 3 اعدادى بعد السلمات

بسالها عن المدرسه قالتلى انا مش بروح قولتلها يا سلام طيب والغياب والانذار والفصل

قالتلى بعشرة جنيه اعمل اعادة قيد وارجع تانى......

ولما بان عليا الدهشه على ايامنا مش كان بيحصل كدة خالص

قالتلى يا بنتى انا كدة بوفر وقت قولتلها يا سلام قالتلى اه

هو فى حد بيدخل اصلا ولا فى حد بيشرح حاجه

انا بنام براحتى الصبح واصحى اروح الدروووس وارجع اذاكر كدة اكسب وقت

وكنا طالعين على السلم سكتت وسكت بس انا سكت وكنت بفكر فى ايام ما كنت بروح

المدرسه وكانوا بيخدوا غياب وكانوا بيبعتوا انذارات وأل ايه كنت بخاف وكنت بروح

المدرسه......

وعجبى....

هناك 45 تعليقًا:

و القادم....أجمل يقول...

بصي الله أعلم بجد
مانا كنت بروح المدرسة
و بستفيد
و كان بالنسبة ليا أحسن من الدرس
الخصوصي لأن كتير مكنش بييجي
بس بجد كنت بستفيد
و كنت بروح الدروس
و برجع اذاكر

يمكن الأجيال اتغيرت
؟؟؟؟؟!!!!!!!!!!!!!

يا مراكبي يقول...

يعني إيه "مدرسة" صحيح؟

kochia يقول...

لا الكلام ده مش مظبوط في كل المدارس طبعا
وفيه مدارس مظبوطة لحد دلوقتي الي حد كبير ومش هقول تماما
والمدرسين كتير منهم كويس وبيتعامل مع ربنا
لكن قدر المستطاع لان الضغط عليه من جهات كثيرة
وعشان انا في (الكارير ) بتكلم عن علم
لكن التلاعب موجود والشهادات المرضية المضروبة موجودة
يعني فيه كدة وفيه كدة

حاسوباتيه يقول...

كان زمااااااااااااااااان دلوقتي انا ماعرفش هما ليه عاملين مدارس اصلا ازا ماحدش بيروحها بجد مهزله بكل المقاييس الي بيحصل ده وماعاتش فيه تعليم خالص

Muslima يقول...

فعلا كتير اوى من المدارس بالاخص الثانوى مبقاش ليها لازمة وان الطلاب ميروحوش فعلا اصبح مكسب للوقت

بس بصراحة على ايامى مكنش فى القصة دى خالص
بس دلوقتى الوضع اتغير فى مدارس كتير ومنها مدرستى اللى كنت بروحها

حزينه يقول...

والقادم... اجمل
اول تعليق
هو مش ممكن هو اكيد ان الاجيال اتغيرت..
واصبح نظام التعليم فى مصر فى النازل

حزينه

حزينه يقول...

يامراكبى
تانى تعليق
المدرسه دى كانت زمان
دلوقتى بقت درووووس
نورتنى

حزينه

حزينه يقول...

كوشيا
اه فى مدارس كويس
بس المدارس اللى مش كويسه اكتر بكتير
والطلبه هما الضحايا
نورتينى

حزينه

حزينه يقول...

حاسوباتيه
فعلا كان زمان
المدرسه والناظرة والمديرة والمدرسين خلاص بقوا كان زمان

حزينه

حزينه يقول...

مسلمه
نورتينى
الدروس الخصوصيه دلوقتى بقت كل حاجه بالنسبه للطلاب
خلاص بقى زمن المدارس راح

حزينه

أحمد حشمت يقول...

لأ صدقيها
الواقع دلوقتي إنه مفيش تعليم في المدارس
أو في الدروس
كله بقى بوظة
وسلطة
...........
انت فين محدش سامع صوتك ليه؟
مستني زيارتك
تحياتي

سلوى يقول...

فعلا الأغلب الوقت بقى مش بيروح المدرسه

هما بياخدوا دروس في كل المواد يبقى فعلا بيكسبوا وقت

المدرسه صارت مضيعه للوقت :))

على أيامي كان في غياب وإنذارات
وكنت بروح وبستفيد

يالا كانت أيام :))

التعليم بيخرب

ربنا يوفقك ويسعدك

سلوى يقول...

قرأت الكثير من الموضوعات في مدونتك

أحييكي عليها :)

الدنيا مش على طول حزن .. دي ساعه كده وساعه كده .. بس هي ساعه الحزن اللي ينحس إنها سنه
*******

اللي بيطلعوا معاش في الستين أنا معاكي إنهم بيتعبوا وبيحسوا إنهم خلاص مالهمش دور
مع إنه مش سن النهايه يعني .. هما لازم يعرفوا كده ويعملوا لهم حياه جديده
مش معقول لما نوصل للستين تبقى شغلتنا انتظار الموت

************
في الحياه بنرتبط بناس ونعرف ناس

في ناس بننساهم
وناس بيفضلوا جوانا
نفتكرهم ونبتسم زي ما قلتي
المهم إنهم جوانا

*********
طولت عليكي أنا عارفه :)
دمتى بكل الخير عزيزتي

صوت من مصر يقول...

هههههههههههههههه
مش لوحدك اكتشفت ده واكتشفت اكتر ان الى فعلا بيوفر وقت بيبقى ناجح ؟

الربان يقول...

تحياتي

و الله للاسف التعليم هو الذي تدهور
و اصبحت المدارس لا تربية و لا تعليم
مبان فقط...ربما تكون آيله للسقوط مثلما سقطت العملية التربوية و التعليمية...

التعليم هو اساس الحرية و الديمقراطية
هو المستقبل...القوة و الريادة...
عرفتي حضرتك لماذا التعليم متأخر؟

تحياتي و تقديري

حزينه يقول...

احمد حشمت
نورتنى
مش كدة بردة خلاص مصر بنظامها دة حتدهور والله
اكيد حعدى

حزينه

حزينه يقول...

سلوى
نورتينى
على ايامنا كان التعليم شويه كويسه
على الاقل كنا بنروح المدرسه
لكن دلوقتى يلا السلام

حزينه

حزينه يقول...

صوت من مصر
والله فعلا جارتنا دى يا احمد
بتطلع من الاوائل
الدنيا ماشيه بالعكس

نورتنى

حزينه

حزينه يقول...

سلوى
وجودك اسعدنى واسعد كلماتى

ياريت تتكرر

حزينه

حزينه يقول...

الربان
نورتنى
مبانى وبس
تصدق ساعات بحس بكدة
بس بتكون المبانى فاضيه
لا مدرسين ولا طلبه ولا تعليم

حزينه

Bannoura يقول...

والله يا حزينة
الحال بقى محزن جدا
لا الزمن عاد هو الزمن
ولا الناس هي الناس
ربنا يستر على بكرة
وعلى أولادنا فيه يا رب
: )

حزينه يقول...

بانورا
ازيك
يارب تكونى بخير
فعلا اذا كان دلوقتى وبيجرا كدة
امال بكرة وبعدة حيجرى ايه

حزينه

wanna b a physician يقول...

ليه هو انتى كنتى فى المدرسة سنة كام يا حزينة
هو الصراحة اوفر اوى انه اعدادى يعنى
احنا كنا كدا فى تانية و ثالثة ثانوى بس

بس ماهو التدهور بيزيد
وعجبى

حزينه يقول...

wanna b a physician
كنت من اربع سنين فى الثانوى
انا مش كبيرة اوى
بس فعلا الحال بيتدهور
شكل جارتى عندها حق

حزينه

عبدالله يقول...

هوا فين زمان ده :)
انا فاكر المدرسه انها زي الكليه الي بيشرح بنحضرله و باقي الوقت بنام فيه علشان نعرف نذاكر باقي اليوم و الكلام ده من زامن قبل ما يطبقوا موضوع الانذار بيتهيئلي :)

مدونتك جميله قريت مجموعة حاجات انتقائيه منها بس ليه لمسة الحزن دي

تحياتي

غني يابهيه يقول...

انتهى عصر المدارس خلاص

وربنا يستر بقى

تحيات بهيه

الباحثة عن السعادة يقول...

لكل صديق يطلع على مدونة طبيب بلا سماعة أرجو أن تقنعوه بعدم غلق المدونة

تقبلوا تحياتى
الباحثة عن السعادة

حزينه يقول...

عبد الله
نورتنى
وياريت الزيارة تتكرر
الحزن قدر

حزينه

حزينه يقول...

غنى يا بهيه
شكله فعلا انتهى
والناس بدل ما يروحوا المدرسه
يروحوا الدرس
نورتينى

حزينه

حزينه يقول...

الباحثه عن السعادة
حاضر والله قولتله
وحقوله تانى

حزينه

موناليزا يقول...

يااه ده انتى قديمة اوى:)
على فكرة الحال من بعضه:)

Rzalp يقول...

معدتش تعليم زى الاول
لكن لسا الدنيا بخير
وفيه الحلو والوحش
تحياتى

حزينه يقول...

موناليزا
باين ان كل الناس بيعانوا من نفس الموضوع

حزينه

حزينه يقول...

Rzalp
نورتنى
ياريت الزيارة تتكرر

حزينه

بسنت يقول...

انتى قلتى المفيد
وعجبى
كل سنه وانتى طيبه بمنايبه العام الهجرى الجديد

عاشقه وغلبانه يقول...

مدرسه........!!
ياااااااااااه
انتي لسه فاكره الايام دي
الدنيا اتغيرت
التعليم بقي من منازلهم دلوقتي
دي الوزاره نفسها بتدي ايام اجازه اكتر من الدراسه
نص الاسبوع اجازه
بلا خيبه قويه
الله يرحم ايام ماكان التعليم تعليم
هو ماكنش اوي يعني بس اهو احسن مما فيش
كله اتغير
حتي الطلبه
ده انتي لو شوفتي واحده في اولي ثانويه رايحه الدرس تقولي عروسه وخارجه تتفسح مع خطيبها
ههههههههههههههههههههه

ربنا يرحمنا برحمته
تحياتي

حزينه يقول...

بسنت
اه والله عجبى
وانتى دايما طيبه

حزينه

حزينه يقول...

عاشقه وغلبانه
والبنات دول حكايه تانيه اصلا
يلا السلامه على ايامنا


حزينه

حياه بلا عنوان يقول...

سورى عوزه تجيبى تعليم زمان زى تعليم دلوقتى لالالالالالالالالاطبعا متفكريش فى كده دلوقتى الطلبه هما مدرسين نفسهم والمدارس بقت زى نادى مش اكتر ياريت تقبلى مرورى عندك والبوسكت كتير حلو
تحياتى ليكى
حياه بلا عنوان

الازهرى يقول...

المشكلةان الموضوع ليس فى كل المدارس وليس كل المدرسين

ففى احدى المناسبات المشابهة وبعد كلام من هذا القبيل ذهبت الى اخى الصغير فى المعهد الدينى (فهو ازهرى ايضا) وكان المدرسين هناك
وعند عودته سألته عماكان يقةله من قبل فاجابنى بان الكلام هو السائدوانهيتشبه باصدقائه فى قولهم هذا ليتمكنوا من الهروب من الالتزام


بالمناسبة التاج ارسل من عدة مصادر فى وقت واحد ولكن كان اول من ارسله صدى الصمت ولذلك اجبته عندى باسمها
كما افتقدك عندى
تحياتى واعتذارى عن الغياب

momken يقول...

اعتقد ان صحبتك صح

ان فى ظل اسواء سياسه تعلميه فى تاريخ مصر

وفى ظل العصر المتردى للتعليم واسواء وزير تعليم فى تاريخ مصر

وفضائح الدرسين والمدارس

يبقى هى صح

واحنا زمان ضيعنا عمرنا
او كنا بنحب اللعب فى المدرسه

البوست واقعى اوى
تحياتى

حزينه يقول...

حياه بلا عنوان
دلوقتى التعليم بقى دروس خصوصيه
نورتنى

حزينه

حزينه يقول...

الازهرى
نورتنى
ازهر وخاص وحكومى
الزم مش بقى هو الزمن
اكيد لازم ادخل عندك

حزينه

حزينه يقول...

ممكن
صحبتى اصلا من المتفوقين
بجد
الدوله اللى عملت كدة
وبترجع تجيب العيب علينا
نورتنى

حزينه

أنا المصرى يقول...

على فكره دى خربانه من زمان اوى بس شكلك انتى اللى كنتى طيبه